நகைச்சுவை மன்னன் நாகேஷ்

தமிழ் திரையுலகம் பல நகைச்சுவை நடிகர்களை தந்திருக்கிறது. ஆனால் இன்று நாம் யோசித்தால் நான்கு அல்லது ஐந்து பேருக்கு மேல் நம் நினைவில் நிறைய நடிகர்கள் நிற்கவில்லை.

சந்திரபாபு: மறக்கமுடியாத ஒரு நடிகர். இவர் படங்களில் நகைச்சுவைக்கு மேல் வெஸ்டர்ன் டான்ஸ் மற்றும் மெட்ராஸ் தமிழ் [பெரும்பாலான படங்கள்] மேலோங்கி நிற்கும்.

பாலய்யா: இவருடைய நகைச்சுவை பெரும்பாலும் ஒரு வில்லத்தனம் கலந்தே இருக்கும். ஆனாலும் ரசிக்க முடிந்த காரணம் அவருடைய அமர்க்களமான "பாடி லாங்க்வேஜ்."

தங்கவேலு: மிகப் பிரமாதமான டயலாக் டெலிவரி இவர் பலம். கல்யாணப் பரிசு, அறிவாளி, தேன்நிலவு ஆகிய படங்களில் இவருடைய காமெடியை ரசிக்காமல் எப்படி இருக்க முடியும்?

சோ: நகைச்சுவை கலந்த சடைர் வகை காமெடி இவருடையது. நக்கல், நையாண்டி இல்லாமல் இவரால் காமெடி செய்ய முடியாது. இவரும், நாகேஷும் சேர்ந்து கலக்கிய நினைவில் நின்றவள் மற்றும் பல படங்களை அடிக்கடி பல சானல்களில் ரசிக்க முடிகிறது.

கலைவாணர் என் எஸ் கே [என் எஸ் கிருஷ்ணன்] பற்றி ஏன் எழுதவில்லை என்று கேட்காதீர்கள். இதுவரை அவருடைய படம் எதுவும் நான் பார்த்ததில்லை.

இவர்களுக்கெல்லாம் மேலாக இன்னும் எத்தனை முறை பார்த்தாலும் அலுக்காத காமெடி நாகேஷின் திறமை. நாகேஷின் காமெடி ஒரு வகைபடுத்தமுடியாத காமெடி.

அலுக்க அலுக்க படங்களில் இப்போதெல்லாம் காமெடி சீன்கள் வருகின்றன. விடாமல் பிரபல ஹீரோக்களின் படங்களை காபி அடித்து கேனத்தனமாக [பத்மஸ்ரீ விருது என்ற அசிங்கம் வேறு] உருப்படாத காமெடி செய்யும் விவேக், அரைத்த மாவையே அரைக்கும் வடிவேலுவின் வில்லங்க காமெடி...இவையெல்லாம் இன்னும் ஒரு இரண்டு வருடங்களுக்கு மேல் தாங்காது.


இதில் கஞ்சா கருப்பு, ரப்பர்வாயன் சந்தானம், அலட்டல் கருணாஸ் ஆகியோரையெல்லாம் காமெடியன் லிஸ்டில் சேர்ப்பது ரொம்ப கஷ்டம். இவர்கள் படங்களை பார்த்து தீரவேண்டியது நம் தமிழ் ரசிகர்களின் தலையெழுத்து!

காமெடி என்றால் அது நிச்சயம் நாகேஷின் காமெடிதான். எவ்வளவு படங்கள், எவ்வளவு வேடங்கள், எல்லாமே அலுக்காத விருந்து. இவருடைய காமெடி யாரையும் பார்த்து காபி அடிக்காத ஒரு உன்னதமான காமெடி. வார்த்தைக்கு வார்த்தை தன்னுடைய குரு "ஜெர்ரி லூயிஸ்" என்று நாகேஷ் சொல்லி வந்தாலும் எனக்கு தெரிந்து எந்த படத்திலும் நாகேஷ் அவரை காபி அடித்ததில்லை.

நாகேஷ் உயிரோடு இருக்கும் போதும் எந்த விருதும் தராமல் இருந்துவிட்டது நம் அரசு என்று நம் பத்திரிக்கைகள் எல்லாம் இப்போது புலம்புகின்றன. அதற்கு அவசியமே இல்லை, ஏனென்றால் ரசிகர்களின் நெஞ்சில் அவருக்கு இருக்கும் ஒரு அசையாத இடமே எல்லா விருதுக்கும் மேலானது.

நாகேஷ் நடித்து வெளிவந்த படங்களை நிறைய பார்த்திருக்கிறேன், நிறைய முறை பாத்திருக்கிறேன். என்னுடைய டாப் 10 இதோ:

1. காதலிக்க நேரமில்லை: எவ்வளவு முறை பார்த்தாலும் அலுக்காத ஒரு படம். இரட்டை அர்த்தம் மட்டுமே காமெடி என்று இப்போதிருக்கும் நிலையில் நம்முடைய திரையுலக படைப்பாளிகள் இது போன்ற ஒரு க்ளீன் காமெடியை முயற்சி செய்து பார்க்கலாம். படத்தில் பாலையாவுக்கு கதை சொல்லு ஒரு சீன் போதும். பிறகு சச்சுவுடன் ஆடும் அந்த ஆட்டம்! அடேங்கப்பா, பிரமாதம்.

2. ஊட்டி வரை உறவு: மறுபடியும் பாலையாவுடன் அட்டகாசமான காமெடி. இந்த முறை சிவாஜியும் சேர்ந்து அமர்க்களப்படுத்துவார். நாகேஷ் டாக்டராக வந்து, உடன் நர்சாக வரும் சச்சுவை "அலமேல், அலமேல்" என்று கூப்பிடுவதே தனி அழகு.

3. தில்லானா மோகனாம்பாள்: பெரும்பாலான ரசிகர்கள் நாகேஷ் முதன்முதலில் வில்லத்தனமான ரோலில் நடித்தது அபூர்வ சகோதரர்கள் என்று நினைப்பார்கள். நாகேஷின் தில்லானா மோகனாம்பாள் கதாபாத்திரம் [வைத்தி என்று ஞாபகம்] ஒரு அட்டகாசமான ரோல். சிவாஜியைப் போன்ற ஒரு உன்னதமான நடிகரையே நக்கல் செய்யும் அளவுக்கு "powerful role." அதை அநாயசமாக செய்திருப்பார்.

4. சர்வர் சுந்தரம்: மறக்க முடியாத படம், மறக்க முடியாத கதாபாத்திரம். அட்டகாசம் செய்திருப்பார். காமெடியுடன் உன்னதமான நடிப்பும் தனக்கு வரும் என்று நாகேஷ் நிரூபித்த படம். "அவளுக்கென்ன, அழகிய முகம்" என்ற அட்டகாசமான பாடலுக்கு நாகேஷ் பிரமாதமாக ஆடுவார்.

5. அன்பே வா: மறைந்த எம்.ஜி.ஆருடன் நாகேஷ் நடித்த நிறைய படங்கள் இருக்கின்றன. அவற்றில் முதன்மையானது, அன்பே வா. சிம்லாவில் எம்ஜிஆர் வீட்டை வாடகைக்கு விட்டு சம்பாத்தியம் செய்யும் போது, எம்ஜிஆருக்கே அந்த வீட்டை வாடகை விட்டு கேப்மாரித்தனம் செய்யும்போது எம்ஜிஆருடன் சேர்ந்து நாமும் சிரிப்போம்.

6. அபூர்வ சகோதரர்கள்: எப்போதுமே வித்தியாசமாக சிந்திக்கும் கமல்ஹாசன், இந்த படத்தில் நம்பியார் லெவலுக்கு நாகேஷை கொடுமையான வில்லனாக காண்பித்து ஒரு மிகப் பெரிய ரிஸ்க் எடுத்தார். ஆனால், நாகேஷின் அட்டகாசமான நடிப்பினால் அந்த ரோல் பல வருடங்களுக்கு பேசப்படும். ஸ்ரீவித்யாவிடம், "புடவைய உருவறதுல நான் மன்னன் தெரியுமா" என்பாரே அந்த ஒரு சீன் போதும்.

7.திருவிளையாடல்: தருமியாக வந்து சிவாஜியுடன் தகராறு செய்யும் சீன்கள் எல்லாமே அட்டகாசம். "ஏழையா பொறக்கவே கூடாதுப்பா" என்பாரே அந்த நடிப்பை எப்படி மறக்க முடியும்?

8.மைக்கேல் மதன காமராஜன்: கமல்ஹாசனின் பணத்தை கையாடல் செய்துவிட்டு, அவரிடம் உதார் விடும் இடங்கள் எல்லாமே சிரிப்புதான். அதிலும், காமேஸ்வரனாக வரும் கமலின் முதல் இரவில் உள்ளே புகுந்து கலாய்க்கும் சீன் அட்டகாசம் என்றால், ராவணன் எப்படி வீணை வாசிப்பார் என்று கமல் பாடி நடித்துக் காட்டும்போது , "நான் என் கஷ்டத்தைச் சொல்ல உங்ககிட்ட வந்தா, நீங்க என்ன சார் இவ்வளவு கர்ண கொடூரமா பாடுறீங்க" என்பது இன்னும் அமர்க்களம்.கிரேஸி மோகனின் வசனம் இந்த படத்தின் மிகப் பெரிய ப்ளஸ்.

9. மேஜர் சந்திரகாந்த்: மிக சமீபத்தில்தான் இந்த படத்தை முழுமையாக ராஜ் டீவீயில் பார்த்தேன். முழுக்க, முழுக்க நாகேஷ் மட்டுமே தெரியும் இந்த படத்தில் மேஜர் சுந்தர ராஜன், ஜெயலலிதா ஆகியோரும் நடித்துள்ளனர். தன் தங்கையின் [ஜெயலலிதா] சாவுக்கு காரணமான சுந்தரராஜனின் மகனை [ஸ்ரீகாந்த் என நினைக்கிறேன்] கொன்று விட கொலைவெறியுடன் அலையும் நாகேஷின் நடிப்பு அட்டகாசம்.மிக வித்தியாசமான படம்.

10. மகளிர் மட்டும்: எந்த விதமான வசனமும் பேசாமல், விதவிதமான பாவனைகள் காட்டாமல், உறைந்து போன ஒரே முக பாவத்துடன் ஒரு பிணமாக பின்னி பெடலெடுதிருப்பார் நாகேஷ். இவர் வரும் நேரம் மிகவும் கம்மி என்றாலும் இந்த மாதிரியான ஒரு ரோலை, இவ்வளவு நன்றாக செய்ய நாகேஷால் மட்டுமே முடியும்.

நாகேஷின் இன்டர்வ்யூ ஹிந்து நாளிதழில் 2007 ம் வருடம் வந்தபோது , நாகேஷ் சொன்ன ஒரு விஷயம் அவர் நடிப்புக்கு அப்பாற்பட்டு ஒரு புத்திசாலி என்பதை நிரூபிக்கும். "“Life works on three premises — I don’t like something that you like, so you don’t like me. You don’t like something but I like it. Hence you don’t like me. You like something, which I also like a lot and there again you don’t like me. So anyway, there will always be people who dislike you. You just have to make your choices and move on.”