Christopher Nolan ஒரு மிகத் திறமையான இயக்குனர் என்பது அவருடைய முதல் படமான "Memento" மூலம் நிரூபணமான ஒரு விஷயம். பின்னாளில் இந்தப் படத்தையே கொஞ்சம் உல்டா செய்து "கஜினி" என்ற பெயரில் வெளியிட்டு இயக்குனர் ஏ.ஆர் முருகதாஸ் ஏகப்பட்ட பணம் பார்த்தார். நம் தமிழ் இயக்குனர்களிடம் ஒரு பழக்கம் தொன்று தொட்டு இருக்கிறது; எந்தப் படத்தை/நாவலைத் தழுவி எடுத்தாலும் அதை சாகும் வரை ஒத்துக்கொள்ள மாட்டார்கள்.
பாரதி ராஜா "நாடோடித் தென்றல்" என்று ஒரு படம் எடுத்தார். படம் ஒன்றும் பெரிய வெற்றி இல்லை என்றாலும், இதன் கதை, சுஜாதா எழுதி குமுதத்தில் முதலில் "ரத்தம் ஒரே நிறம்" என்ற பெயரிலும், பின்னர், "கருப்பு, சிவப்பு வெளுப்பு" என்ற பெயரிலும் வந்த கதையின் அப்பட்டமான காப்பி. இந்த லட்சணத்தில், அந்தப் படத்தின் கதை இளைய ராஜா என்று டைட்டிலில் போடுவார்கள்.
இதே போல சத்யராஜ் நடித்து "ஏர்போர்ட்" என்று ஒரு படம். மலையாள இயக்குனர் ஜோஷி இயக்கத்தில் 1993 ம் வருடம் வந்தது. இது சுஜாதா எழுதி மிகப் பிரபலமடைந்த "ஜே.கே" என்ற நாவலின் அப்பட்டமான காப்பி. பாவம் சுஜாதா இதைப் பற்றி வாசகர்கள் கேட்டபோது பெருந்தன்மையாக, "குறைந்தபட்சம், இந்தப் படம் ஜே.கே நாவலைத் தழுவி எடுக்கப்பட்டது என டைட்டிலில் ஒரு கார்டு போட்டிருக்கலாம்," எனச் சொல்லி அதோடு அதை விட்டுவிட்டார்.
இதைப் போல ஏராளமான உதாரணங்கள் சொல்லிக்கொண்டே போகலாம். ஓகே, இப்போது, இன்சப்ஷன்:
தொழில் போட்டியில் எதிராளியின் தொலைபேசியை ஒட்டு கேட்டபது, அவனுடைய அலுவலகத்தில் தன்னுடைய ஆளை வைத்து வேவு பார்ப்பது இதெல்லாம் பழைய ஸ்டைல். எதிராளியின் கனவில் புகுந்து அவன் செய்கிறான், என்ன நினைக்கிறான் என்று தகவல்களை சேர்த்து அதை அவனுக்கெதிராக உபயோகித்து வெற்றி பெற நினைக்கும் ஒருவன் (Ken Watanabe), அவனுக்கு உதவி செய்தால் தன் மீது இருக்கும் (தேவையிலாத) பழி நீங்கி, மறுபடியும் தன் குழந்தைகளுடன் ஒன்று சேரலாம் என நினைக்கும் கதாநாயகன் (Leonardo Di Capiro), அவனுக்கு உதவி செய்ய நினைத்து சிக்கலில் சிக்கிக் கொள்ளும் அவனுடைய நண்பர்கள் என்று ஆரம்பிக்கும் கதை எக்ஸ்ப்ரஸ் வேகத்தில் பயணித்து அட்டகாசமான க்ளைமாக்சில் முடிவதுதான் இன்சப்ஷன் படத்தின் மிகப் பெரிய பலம்.
இயக்குனர் Christopher Nolan மிக அருமையாக திரைக்கதை அமைத்திருப்பது படத்தின் பெரும்பகுதி குழப்பமில்லாமல் நகர உதவுகிறது. சத்யம் தியேட்டரில் அதிசயமாக ஆங்கில சப்-டைட்டில் போட்டு படத்தை மேலு ரசிக்கும் செய்து விட்டார்கள். அதிரடி பின்னணி இசையில் Hans Zimmer சும்மா புகுந்து விளையாடுகிறார். Wally Pfister இன் ஒளிப்பதிவு மிகவும் அற்புதமாக இருக்கிறது. கனவுக் காட்சிகளில் வித்தியாசமான லைட்டிங் கொடுத்து, மற்ற காட்சிகளில் திரைகதையின் வேகத்துக்கு ஈடு கொடுத்து காமிரா பயணிக்கிறது.
பெரும்பாலான கனவுக் காட்சிகளில் CG உதவி இல்லாமல் அரங்கம் (setting) அமைத்து மிகவும் மெனக்கெட்டிருக்கிரார்கள்.
மிகுந்த எதிர்பார்ப்புடன் வந்திருக்கும் இந்த படம் ஒரு technical/technological marvel என்பதில் வியப்பில்லை.
Comments