சுப்ரமணியபுரம் திரைப்பட பாடல்கள்:

இந்த படத்தின் மேல் எனக்கு எந்த ஸ்பெஷல் காதலும் இல்லை. ஜேம்ஸ் வசந்தன் முதன் முறையாக இசை அமைத்திருக்கும் இந்த படத்தின் ஆல்பம் ரிலீஸ் சமீபத்தில் நடந்தது. இந்த நிகழ்ச்சியின் ஈவண்ட் மேனேஜர் என்ற முறையில் கலந்துகொண்டேன். சுப்ரமணியபுரம் என்பது மதுரையில் நான் வாழ்ந்த பகுதி. என் கல்லூரி காலம் கழிந்த பகுதி என்பதால் ஒரு ஆர்வம். படத்தின் கதைக் களமும் அதே மதுரையைச் சேர்ந்த சுப்ரமணியபுரம் என்பதால் இன்னும் ஈடுபாடு அதிகரித்தது.

படத்தில் தெரிந்த ஒரே முகம் கஞ்சா கருப்பு ஒருவர்தான். '80 களில் நடந்த கதை என்பதால் படத்தில் வரும் ஆண்கள் எல்லோரும் bell bottoms அணிந்து கொண்டு, நிறைய முடியுடன் ஓரளவுக்கு ரியலாக இருக்க முயன்று இருந்தார்கள்.

படத்தின் இயக்குனர் பாலா மற்றும் அமீர் ஆகியோரிடம் உதவி இயக்குனராக இருந்ததால் நிறையவே எதிர்பார்ப்பு இருப்பதாக சொல்கிறார்கள்.

பாடல்கள் பற்றி சொல்கிறேன்.

ஏ ஆர் ரஹ்மானின் தயவால் ஆரம்பித்த ஒரு குளறுபடி யார் வேண்டுமானாலும் பாடலாம் என்ற ஒரு நிலை. ஒரு பக்கம் நிறைய பேருக்கு வாய்ப்பு கிடைப்பது நல்ல விஷயம் என்றாலும், தமிழே கொஞ்சம் கூட தெரியாத, அல்லது இன்னும் அவலமான விஷயமாக தமிழே உச்சரிக்கத் தெரியாத இளைஞனோ அல்லது இளைஞியோ பாடலைக் கடித்து குதறி அது மிகப் பரிதாபமாக வெளியே வருகிறது.

ஜேம்ஸ் வசந்தனும் தன் பங்கை நன்றாக செய்திருக்கிறார். இந்த படத்தில் வரும்:
-முதல் பாடல், 'காதல் சிலுவையில் அறைந்தாய் என்னை' என்ற ஷங்கர் மஹாதேவன் பாடிய பாட்டு ரொம்ப சுமார் ரகம், ஷங்கரின் மதுரமான குரல் ஒரே ப்ளஸ் பாய்ண்ட்
-இரண்டாவது பாடல், 'கண்கள் இரண்டால்' என்ற ஹிட் பாட்டு. பெல்லி ராஜ், தீபா மரியம் என்று இருவர் பாடியது. இந்த பாடலின் வித்தியாசமான மெட்டு நன்றாக இருக்கிறதே என்று யோசித்தபோது, பல்லில் எதோ உறுத்துகிறதே என்று பார்த்தால், இந்த மெட்டு வெகு பல வருஷங்களுக்கு முன் சிவகுமார், ஸ்ரீதேவி நடிப்பில் (படம் பெயர் ஞாபகமில்லை) வந்த Dr பாலமுரளி கிருஷ்ணா பாடிய 'சின்னக் கண்ணன் அழைக்கிறான்'(இளையராஜாவின் இசையில் வந்த இந்த பாடல் அப்போது மிகப் பிரபலம்)என்ற மெட்டோடு அப்படியே ஒத்துப் போகிறது. சரி, இன்ஸ்பிரேஷேன் என்று வைத்துக் கொள்ளலாம், காப்பி என்று சொல்லவேண்டாம் (பாவம், ஜேம்ஸ் வசந்தன் முதல் படம் என்பதால் பாடல் ஹிட் ஆகவேண்டிய கட்டாயம்).

சரி அடுத்த பாடல் என்று யோசிக்குமுன் திரும்பவும் எதோ உறுத்தியது. அட, பாக்கு கூட வாயில் போடவில்லையே என்று பார்த்தால், அதே மெட்டில் இன்னொரு பாடலின் சாயலும் தெரிந்தது. இதுவும் இளையராஜா இசை அமைத்த பாடல்தான், 'தலையை குனியும் தாமரையே' என்ற பாடல். பற்பல வருடங்களுக்கு முன் திசை மாறிய பறவைகள் என்ற படத்தில் சரத் பாபு, பருமயமாக இருக்கும் சுமலதா என்ற நடிகையை பார்த்து பாடுவார்.

அடுத்த பாடல் பென்னி தயால் என்பவர் பாடிய 'தேநீரில் சிநேகிதம்' என்ற பாடல். ஓகே ரகம்.

அடுத்த பாடல், 'மதுர குலுங்க, குலுங்க' என்ற குத்துப் பாடல். சுசித்ரா, வேல் முருகன் மற்றும் மதுரை (!) பானுமதி ஆகியோர் பாடிய பாடல்.

அப்படியே மதுரை மண்ணின் மணத்துடன், தாரை தப்பட்டை முழங்க, செமத்தியான கிராமியப் பாடல். ஒரே ஒரு குறை என்னவென்றால் எல்லாப் பாடல்களிலும் (ஷங்கர் மஹாதேவன் பாடல் விதிவிலக்கு) பாடுபவர்கள் புயலை புயள் என்றும், முயலை முயள் என்றும், பள்ளியை பல்லி என்றும், கல்லை கள் என்றும், மல்லிகை என்பதை மள்ளிகை என்றும் பாடி வெறுபபடிக்கிறார்கள். அதுவும் இந்த பாடலில் கடைசியில் அம்மா, வீரம்மா காளி, எங்க அம்மா வீரம்மா காளி என்பதை 'வீரம்மா காலி' என்று பாடுவது கொடுமையின் உச்சம்.

வீரம்மா காளியையே காலி பண்ணிவிட்டால் அப்புறம் நாமெல்லாம் எம்மாத்திரம்?