கடந்த 2008 ஆண்டு, இது வரை பகல் கொள்ளை அடித்து வந்த ரியல் எஸ்டேட் பிசினஸுக்கு ஒரு பெரிய அடியாக இருந்தது. 300-400% வரை லாபம் பார்த்து வந்த பல பெரிய புள்ளிகள் வியாபாரம் படுத்து விட்டதால் நிலை தடுமாறினர். லட்ச லட்சமாக கொட்டி வாங்கிய நிறைய இளித்த வாயர்கள் சமீபத்தில் பெய்த பெரும் மழையில், நிறைய இடங்களில் வீட்டுக்குள் தண்ணீர் புகுந்து ஏராளமான இன்னல்களுக்கு ஆளானார்கள்.
இந்த மந்த நிலையிலிருந்து வெளிவர ரியல் எஸ்டேட் முதலாளிகள் புதிது புதிதாக பரிசுத் திட்டங்களை அறிவித்து மக்களை மீண்டும் கவர பிரம்ம பிரயத்தனம் செய்கிறார்கள்.
நேற்று இரவு NDTV பார்த்துக் கொண்டிருந்த போது ஒரு விளம்பரம்; பெங்களூரில் ரூ. 69 லட்சத்துக்கு ஒரு வில்லா வாங்கினால் ஒரு புத்தம் புதிய மெர்சிடிஸ் பென்ஸ் கார் இலவசம். இதில் ஒரு முக்கிய அம்சம் என்னவென்றால், இந்த வில்லா நிச்சயம் தும்கூரிலோ அல்லது சிக்பெல்லாபூரிலோ இருக்கும். ஏதாவது ஒரு காய்ந்த ஏரியை பிளாட் போட்டு விற்பனை செய்து அதில் வில்லாக்கள் கட்டப்பட்டிருக்கும். அடுத்த மழையின் போது வெள்ளம் உள்ளே புகுந்து, பென்ஸ் காரை படகாக மாற்றி உபயோகிக்க வேண்டியிருக்கும்; பென்ஸ் காரின் விலையையும் சேர்த்து, வில்லாவின் மதிப்பு ரூ. 40 லட்சத்துக்கு மேல் இருக்காது;
இதே மந்த கதியில் நம் பொருளாதாரம் இருந்தால் இன்னும் கொஞ்ச நாட்களில் தெருத் தெருவாக "வீடு வாங்கலையோ சாமி, வீடு, வில்லா வாங்கலையோ, வில்லா" என்று கூவி வியாபராம் செய்ய ஆரம்பித்து விடுவார்கள். அப்போதும் ஒரு மெர்சிடிஸ் பென்ஸ் அல்லது ஒரு BMW நிச்சயம் இலவசமாகக் கிடைக்கும்.
Comments